အပြစ်နဲ့ဒဏ်ရာ

 အတောင် မစိုစွတ်ဘူးဆိုပေမယ့်
မိုးခိုရာရှာနေမိတဲ့ ငှက်တစ်ကောင်လိုပဲ
နေရောင်ကိုကာကွယ်ခဲ့သော်လည်း
ရေမလုံတဲ့ သစ်ပင်တွေဟာ သစ္စာမဲ့တယ် မဆိုရာ. . .။

ပျော်အောင်ကြိုးစားနေပါဆိုတဲ့ စကားဟာ
စစ်ပွဲကြားက အသက်တစ်ချောင်းအတွက်
မိုးကြိုးကို ကာစရာထန်းလက်ပမာ
သေနတ်ကို လွှတ်ချလိုက်ရုံနဲ့
ငြိမ်းချမ်းရေး ရပါ့မလား. . . ။

ထွက်သွားတဲ့ ရထားနဲ့ နေခဲ့ရတဲ့ ခရီးသည်ကြားက
ကွာခြားချက်က ဘာများလဲ။
လက်တွေ့ဘဝနဲ့ အိပ်မက်ဆိုးကတော့
ထမ်းပိုးနဲ့ လှည်းတုတ်လိုပဲ အချစ်ရယ်
ဒီအချိန်မှာ ငရဲကို ရွေးချယ်သွားသူတွေက သူရဲကောင်းပဲ. . . ။

Continue Reading...

ကောင်မလေးဖတ်ဖို့ အချစ်ကဗျာ

  အနုမြူစစ်ကြီးဖြစ်မဖြစ်ထက်
ကိုယ်က မင်းပြန်ချစ်မချစ်ပဲ အရေးကြီးနေမိတယ်။
ကွန်မြူနစ်စနစ်ရဲ့ ကျဆုံးမှုထက်ဘုံစနစ်နဲ့
မင်းကို မျှော်လင့်နေတတ်သူတွေကိုပဲစိတ်ညစ်နေမိတယ်။

သစ်ရွက်လှုပ်ရင်လည်းချစ်တယ်။
သက်ဆင် မရှိတော့ရင်လည်းချစ်တယ်။
ကိုယ့်နှလုံးသားကို မဲပေးသူမရှိလည်း
လမ်းမလွတ်ပေမယ့် နတ်ရဲတဲ့သစ်ပင်လို
ပေကပ်ရှင်သန်ရင်းချစ်တယ်။

လေးဖြူသီချင်း မဆိုတော့လည်း
ကိုယ်က မင်းကို ချစ်နေမှာပါပဲ
တို့မြို့လေးကို လူမုန်းများနေလည်း
ချစ်တယ်။
ဆူနာမီနဲ့နီးကပ် ..
ကက်ထရီနာလိုအဆုံးရှုံးများစေတတ်လည်း
ချစ်မယ်။
တင်မိုသီမက်ဗေး ကွယ်လွန်ပြီးလည်း
ငါကမင်းကို ချစ်နေခဲ့တယ်။

မင်းကိုချစ်နေရမယ်ဆို
အမေရိကန်အမုန်းသမားလည်း ဖြစ်ချင်တယ်
အီရတ်က အသေခံဗုံးတစ်လုံးလည်း ဖြစ်မယ်
ကြိုးပေးခံရမယ့် ပင်လယ်ဓားပြတွေထဲလည်း
ကိုယ်ဝင်ရောက် တန်းစီပြရဲပါတယ်။

ချစ်ရတာမမောပါဘူး ကလေးရယ်
အလင်းမဲ့ ညတွေများလို့
လမ်းမှားမှားနေတာကပဲ ခက်ခဲ။
ပဲရစ်မင်းသားလိုလည်းချစ်တယ်၊ ထရိုဂျင်မြင်းရုပ်ကြီးလိုလည်းချစ်တယ်။
မင်းကိုရဖို့အတွက်ဆို ရေနံဈေးတွေတက်နေလည်း
ကြက်ဆူဆီနဲ့ခုတ်မောင်းရင်း
အဖာအထေးများခဲ့တဲ့ လမ်းဟောင်းကြီးအတိုင်းချစ်မယ်။

 တကယ်ပါကောင်မလေးရယ်
လိမ်ခဲ့တာတွေများလို့ကြမ်းပိုးနဲ့လိပ်မခွဲတတ်တော့ပေမယ့်
မင်းကိုတော့ . . . .
သည်းသည်းမည်းမည်း ချစ်နေခဲ့တာ အမှန်။


(၂ဝဝ၆ ခုနှစ်က ကဗျာအဟောင်းလေး —
အဲသည့်အချိန်က လူပြောများတဲ့ သတင်းတွေနဲ့ဆက်စပ်ပြီးရေးထာခဲ့တာမို့
အခုအချိန်မှဖတ်ရတာ အဆက်အစပ်မဲ့နိုင်ပါတယ်..)

Continue Reading...

မရှိခြင်းသက်သက်မေ

 
နှုတ်ဆက်ပါတယ် မေ . . .
ဘယ်အမှတ်တရကိုမှ ဆက်လက်မှတ်သားထားဖို့
အင်အားမရှိတော့ သမို့။

နှုတ်ဆက်ပါတယ်

အဝေးက လွမ်းဆွတ်ခြင်းများ
နီးစပ်ခဲ့ခြင်း၏ အစွန်းအထင်းများ
မဖြေရှင်းနိုင်ခဲ့သော ပုစ္ဆာများ
ဖြေရှင်းရန် ကြွင်းကျန်ခဲ့သော ဝဋ်ကြွေးများ
ရန်ညှိုး အမုန်းတရားများလည်း
ကျေအေး လွင့်စင်သွားပါစေ . . .

ကိုယ် နှုတ်ဆက်ပါတယ် မေ . .

လက်နက်ချဖို့ လိုအပ်ချိန်မှာ
လက်နက်ချခဲ့ပြီး
မျှော်လင့်မိသမျှ လောင်ကျွမ်းကုန်ဆုံး
ကိုယ့်အရိပ်ထဲက အမှောင်မှာ လုံအောင်ပုန်းရင်း
စိတ္တဇနဲ့ ဂီတ ခွဲခြားမသိတဲ့ စိတ် . . .
သည်အခန်းဟာ အတိတ်ပဲဆိုပါတော့
ကိုယ်တံခါးပိတ်လိုက်ပါပြီ။

မေ . . .

နောက်တစ်နှစ်ဟာ နောက်တစ်ဘဝလည်းဖြစ်ချင် ဖြစ်မယ်
ဆက်ဆက်ရောက်လာမယ့် မိုးရေစက်တွေပေမယ့်
တစ်ချိန်က ထီးတစ်လက်ကတော့ သေဆုံးသွားခဲ့ပြီလေ . . .။

အခုခြောက်ခြားနေခဲ့မိတာလည်း
ဘယ်တုံးကမှ မမက်ဖူးတဲ့ အိပ်မက်
ကိုယ်ကျဆုံးခဲ့တယ်ဆိုတာဟာလည်း
ဘယ်တုံးကမှ မဖြစ်ခဲ့တဲ့ စစ်ပွဲတပွဲ
သည်တစ်ညအတွက်တော့ နှစ်ချိုက်စွာ အိ်ပ်စက်နိုင်ဖို့ပဲ
ကိုယ် အလိုရှိခဲ့တယ်
တိတ်ဆိတ်စွာ ကုန်ဆုံးသွားလိုက်တော့
ကိုယ့်ရဲ့ စိတ္တဇ မေ . . ။

 နှုတ်ဆက်ပါတယ် မေ  . . .

Continue Reading...

လုပ်ဇာတ်

  စိတ်ကို သော့ခတ်လိုက်တယ်။
မင်းလည်း မလွမ်းနဲ့
ငါလည်း မလွမ်းနဲ့
ကြည့် . . . .
သော့တံကို ပင်လယ်ထဲပစ်လိုက်တယ်
မင်းလိုက်မဆယ်နဲ့ . . .။

မင်းလက်မောင်းလေးကို နမ်းမိတဲ့ အနမ်းတောင်
စိတ်ထဲချန်မထားဘူး
ဖြတ်လျှောက်လာရင်း ကြုံရာ ရထားတစင်းနဲ့ထည့်ပေးလိုက်တယ်။
အခုဆို တော်တော်ဝေးဝေးရောက်သွားလောက်ပြီ
ပြန်မလာဖို့လည်း ဆက်ဆက်မှာလိုက်တယ်။

သော့ခလောက်တန်းလန်းနဲ့ စိတ်ကိုကြည့်ကြည့်နေရတာ
ငါဘယ်တော့မှ နောင်တမရဘူး
အချစ်ဆိုတာ ရူးသွပ်မှုတမျိုးပဲ
မင်းဖုန်းကို အကြိမ်ကြိမ်ခေါ်ကြည့်ပြီး ငါ့အတွက်ထူးသံမရှိတဲ့နေ့က
ငါ ကိုယ့်ကိုယ်ကိုယ် သိခဲ့တယ်။
အခု ငါကောင်းသွားပြီ။

ပြောနေရတာ မလွဲသာမရှောင်သာပဲ
ငါတစက်မှ မလွမ်းဘူး
မင်းရဲ့ သတိရခြင်းအကြောင်းလည်း ငါမတွေးတော့ဘူး
မင်းအကြောင်းတွေ အကုန်လှဲကျင်းထုတ်ပြီးမှ
ငါစိတ်ကို သော့ခတ်လိုက်တာပဲ။
ဒီအတွက် ငါ့ကိုယ်ငါ ယုံကြည်မှု အပြည့်ရှိတယ်။

နည်းနည်းတော့
သွေးရူးသွေးတန်းနိုင်လိမ့်မယ်
ဘာဆိုဘာမှ အလိုမရှိတော့ဘူး
မယုံရင် မင်းလာကြည့်လို့ရတယ် .  . .
တံခါးကို မင်းလက်ဖဝါးလေးနဲ့ တွန်းဖွင့်လိုက်ရုံပဲ . . .
ခတ်ထားတဲ့ သော့က မင်းရဲ့ သူလျှိုဖြစ်တဲ့အတွက်
အခက်အခဲမရှိလောက်ဘူး။

Continue Reading...

အ အ အိပ်မက် (၂)

 ကျနော်ဘာဖြစ်ချင်တာလဲဆိုရင် ဘာမှမဖြစ်ချင်ဘူး... ဘာမှမဖြစ်ချင်တဲ့စိတ်ကြောင့်ပဲ
စိတ်ပျက်လက်ပျက်ကျရှုံးဖူးတယ်။ သိပ်နက်ရှိုင်းတဲ့ဒဏ်ရာတွေဟာ ဘယ်တော့မှ
အရှင်းမပျောက်နိုင်သလိုပဲ.. တိုက်ဆိုင်ရင် အဲဒီအကြောင်းကို ပြန်တွေးနေမိသေးတယ်။ ဒါထက်ပိုပြီး စိတ်လှုပ်ရှားစရာ နှုတ်ခမ်းတွေအကြောင်းရှိသေးပေမယ့်။ အဲဒီတစ်ယောက်က သူ့အကြောင်း ထုတ်ဖော်ပြောဆိုခံရမှာကို နှစ်သက်ပုံမရဘူး။ မနက်က တော်တော် ဝေးဝေးရောက်မှ သူဖျတ်ကနဲလှည့်ကြည့်တာ အမှတ်တမဲ့မြင်လိုက်တယ်။ သူ ကျနော့်ကို လှည့်ကြည့်တာလား။
လှည့်ကြည့်စရာကလည်း ကျနော်ပဲ ရှိတာကို..။ သူ့အကြောင်းဆို သူနဲ့ အတူတွဲလာခဲ့ဖူးတဲ့ ကလေးချီထားတဲ့လူအကြောင်းပါလာပြန်ရော၊ မဖြစ်နိုင်တာ... သူသာ အိမ်ထောင်ရှိမယ်ဆို ဘာလို့လှည့်ကြည့်နေမှာလဲ။ မနက်က သူ့လက်ထဲမှာ ဖုံးတစ်လုံးကိုင်ထားတာတွေ့မိတယ်၊
သူ့ဖုံးနံပါတ်ကို သိချင်မိပေမယ့် ဖုံးဆက်ပြီး ကျနော်ဘာပြောရမလဲ ကျနော်မသိဘူး။ တခါတုံးက ညလုံးပေါက်နီးပါ:.. တညလုံးတော့မဟုတ်ဘူး ဖုံးပြောခဲ့ဖူးတဲ့ ညတညရှိတယ်.. ဘာတွေပြောခဲ့ကြလည်းတော့ ကျနော်မမှတ်မိဘူး.. တော်တော်မိုက်တယ်.. အခုတောင် ပြန်တွေးရင်း ပြုံးမိတဲ့အထိပဲ .. တခါတလေတော့ ကျနော်သူ့ကို သတိရတယ် များသောအားဖြင့်တော့ သတိရမချင်ဘူး ကျနော်နဲ့သူကြားမှာ ဘယ်တုံးကမှ ကြိုးတွေ မရှိခဲ့ဘူးတဲ့ . . သူ့နှုတ်ခမ်းတွေအကြောင်း သူပြန်သိချင်ဦးမှာလား။ ထားလိုက်ပါ အဲသည့် နှုတ်ခမ်းပိုင်ရှင်က သူ့အကြောင်း ကို ထုတ်ဖော်မပြောဖို့ အတန်တန်မှာထားတာပဲ.. ထားရတာတွေ သိပ်များရတဲ့အထဲက နောက်ထပ်ထားလိုက်ရတဲ့တစ်ခုပေါ့ . . .။ အခု ကျနော့်ရဲ့ မရေမရာ စိတ္တဇဆန်ဆန် သူမနဲ့ကော သည်လိုဖုံးပြောခွင့်ရဦးမှာလား.. သည်အတွေးဟာ သိပ်များလွန်းသွားပြီ။
ကျနော့်မှာ ရည်းစားရှိနေတာပဲ.. သူသိရင် စိတ်ဆိုးမှာ သေချာတယ်။

Continue Reading...