နှုတ်ဆက်ပါတယ် မေ . . .
ဘယ်အမှတ်တရကိုမှ ဆက်လက်မှတ်သားထားဖို့
အင်အားမရှိတော့ သမို့။
နှုတ်ဆက်ပါတယ်
အဝေးက လွမ်းဆွတ်ခြင်းများ
နီးစပ်ခဲ့ခြင်း၏ အစွန်းအထင်းများ
မဖြေရှင်းနိုင်ခဲ့သော ပုစ္ဆာများ
ဖြေရှင်းရန် ကြွင်းကျန်ခဲ့သော ဝဋ်ကြွေးများ
ရန်ညှိုး အမုန်းတရားများလည်း
ကျေအေး လွင့်စင်သွားပါစေ . . .
ကိုယ် နှုတ်ဆက်ပါတယ် မေ . .
လက်နက်ချဖို့ လိုအပ်ချိန်မှာ
လက်နက်ချခဲ့ပြီး
မျှော်လင့်မိသမျှ လောင်ကျွမ်းကုန်ဆုံး
ကိုယ့်အရိပ်ထဲက အမှောင်မှာ လုံအောင်ပုန်းရင်း
စိတ္တဇနဲ့ ဂီတ ခွဲခြားမသိတဲ့ စိတ် . . .
သည်အခန်းဟာ အတိတ်ပဲဆိုပါတော့
ကိုယ်တံခါးပိတ်လိုက်ပါပြီ။
မေ . . .
နောက်တစ်နှစ်ဟာ နောက်တစ်ဘဝလည်းဖြစ်ချင် ဖြစ်မယ်
ဆက်ဆက်ရောက်လာမယ့် မိုးရေစက်တွေပေမယ့်
တစ်ချိန်က ထီးတစ်လက်ကတော့ သေဆုံးသွားခဲ့ပြီလေ . . .။
အခုခြောက်ခြားနေခဲ့မိတာလည်း
ဘယ်တုံးကမှ မမက်ဖူးတဲ့ အိပ်မက်
ကိုယ်ကျဆုံးခဲ့တယ်ဆိုတာဟာလည်း
ဘယ်တုံးကမှ မဖြစ်ခဲ့တဲ့ စစ်ပွဲတပွဲ
သည်တစ်ညအတွက်တော့ နှစ်ချိုက်စွာ အိ်ပ်စက်နိုင်ဖို့ပဲ
ကိုယ် အလိုရှိခဲ့တယ်
တိတ်ဆိတ်စွာ ကုန်ဆုံးသွားလိုက်တော့
ကိုယ့်ရဲ့ စိတ္တဇ မေ . . ။
နှုတ်ဆက်ပါတယ် မေ . . .
Monday, June 24, 2024
မရှိခြင်းသက်သက်မေ
Subscribe to:
Post Comments (Atom)
No comments:
Post a Comment